पंजाबमध्ये ‘आप’चं वादळ; भाजप भुईसपाट, 680 हून अधिक जागांवर ऐतिहासिक विजय
Aam Aadmi Party ने पंजाबमधील स्थानिक स्वराज्य संस्थांच्या निवडणुकीत अभूतपूर्व विजय मिळवत पुन्हा एकदा आपली ताकद सिद्ध केली आहे. 26 मे रोजी पार पडलेल्या या निवडणुकांची मतमोजणी आज सुरू झाली असून सुरुवातीपासूनच ‘आप’ने आघाडी घेत विरोधकांना मोठा धक्का दिला आहे.
या निवडणुकीत आठ महानगरपालिका, 75 नगर परिषद आणि 20 नगर पंचायतींसाठी मतदान झाले होते. निकालांमध्ये ‘आप’ने तब्बल 680 पेक्षा अधिक जागांवर विजय मिळवत पंजाबच्या राजकारणात आपली जादू कायम असल्याचे दाखवून दिले. दुसरीकडे Bharatiya Janata Party ला केवळ 52 जागांवर समाधान मानावे लागले आहे. तर Indian National Congress आणि Shiromani Akali Dal यांचाही मोठा पराभव झाल्याचे दिसून आले.
राजकीय वर्तुळात या निवडणुकीकडे आगामी विधानसभा निवडणुकीची ‘सेमीफायनल’ म्हणून पाहिले जात होते. त्यामुळे सर्वच पक्षांची प्रतिष्ठा पणाला लागली होती. मात्र निकालांनी स्पष्ट केले की, पंजाबमध्ये अजूनही ‘आप’ची पकड मजबूत आहे. गेल्या विधानसभा निवडणुकीप्रमाणेच स्थानिक स्वराज्य संस्थांच्या निवडणुकीतही ‘आप’चे वर्चस्व कायम राहिले.
निवडणुकीपूर्वी भाजपने संघटनात्मक पातळीवर मोठे बदल करत Kewal Singh Dhillon यांच्याकडे प्रदेशाध्यक्षपदाची जबाबदारी सोपवली होती. नव्या नेतृत्वामुळे कार्यकर्त्यांमध्ये ऊर्जा निर्माण होईल आणि विधानसभा निवडणुकीपूर्वी पक्षाला बळ मिळेल, अशी भाजपची अपेक्षा होती. मात्र स्थानिक स्वराज्य संस्थांच्या निवडणुकीत भाजपच्या अपेक्षांवर पाणी फिरल्याचे चित्र दिसून आले.
राजकीय तज्ज्ञांच्या मते, पंजाबमध्ये भाजपचा हा पराभव केवळ धक्का नसून आगामी विधानसभा निवडणुकांसाठी धोक्याची घंटा आहे. स्थानिक मुद्दे आणि जनतेशी थेट संपर्क यामध्ये ‘आप’ने बाजी मारल्याचे दिसून आले. या निकालांमधून पंजाबमध्ये भाजपला अद्याप अपेक्षित जनाधार मिळालेला नसल्याचे स्पष्ट झाले आहे.
एकूणच, पंजाबच्या राजकारणात ‘आप’ने पुन्हा एकदा आपले वर्चस्व सिद्ध करत विरोधकांना मोठा झटका दिला आहे. स्थानिक स्वराज्य संस्थांच्या निवडणुकीतील हा विजय आगामी विधानसभा निवडणुकांसाठी ‘आप’साठी मोठा आत्मविश्वास वाढवणारा ठरणार आहे.
About the Author
